Einkaþjálfun í Jóga og Lífstílsráðgjöf

Ég byrjaði í einkakennslu hjá Talyu því mig langaði fyrst og fremst að dýpka skilning minn á jóga. Mig langaði að læra meira um einstaklingsbundna nálgun og öðlast færni í að stunda jóga á eigin hátt í takt við minn líkama. Hjá Talyu hef ég lært ótal margt sem ég er afar þakklát fyrir. Ég bý yfir meiri sjálfsaga og lít á mína iðkun sem óumflýjanlegan hluta af mínum degi. Einnig bý ég yfir aukinni færni þegar kemur að andardrættinum og tengingu hans við mína persónulegu iðkun. Það sem kom mér sennilega mest á óvart er hversu djúpstæð áhrif þessi iðkun hefur haft á mína heilsu, bæði andlega og líkamlega. Ég hef öðlast ákveðna tengingu við eigin líkama og betri skilning á því hvað jóga getur gefið manni dags daglega. Ég hlakka alltaf til að mæta til Talyu enda hefur hún afar hlýja nærveru og er einstaklega fær í því að nálgast æfingarnar á heildstæðan hátt og gefa mér tækifæri til að þroskast á eigin vegum. Ég er spennt að sjá hvert áframhaldandi iðkun leiðir mig.

Ég var búinn að vera prufa hina ýmsu jóga kennslu sem var einhvern veginn ekki að henta mér. Eftir smá leit á alheimsvefnum þá rakst ég á lítið jóga stúdíó í skipholtinu sem bauð uppá einkakennslu í 1 á 1. Eitthvað sem ég hafði ekki séð áður. Ég var fljótur til og pantaði mér tíma hjá Gumma sem fyrst. 

Þetta er einhver sú besta ákvörðun sem ég hef tekið fyrir sjálfan mig. Þau Gummi og Talya í Art of Yoga eru einstök, alveg sér á báti með nálgun á jóga og svo ekki sé minnst á yndislega nærveru. Ég hef á okkar vegferð dýpkað skilning minn á líkamanum og sérstaklega hvernig hausinn virkar. Hvernig hægt og rólega sé leiðin að bættri líðan, bæði líkamlegri og andlegri.

Ég mæli hiklaust með að skella sér í tíma hjá þeim ef þú ert að leita að dýpri nálgun á jóga og heilsu almennt.

Hef í rúmlega 20 ár gert fjölmargar tilraunir til að nýta mér líkamsræktarstöðvar án mikils árangurs. Hætti yfirleitt að mæta fljótlega. Komst að því að hóptímar í Jóga hentuðu betur án þess að ég næði að festa rútínu í sessi. Mætti vel á tímabilum, svo komu lengri tímabil þar sem mætingin datt niður. Hef nú gert Vinijóga æfingar daglega, með örfáum undantekningum, síðan ég byrjaði síðastliðið sumar.

Ástæðurnar fyrir því hve vel hefur gengið að halda sig við efnið eru margþættar. Gott samband við kennara og fagmennska hans. Formið á iðkuninni hefur hentað mér vel. Að vera bæði undir leiðsögn en geta líka æft heima hjá sér í stað þess að fara annað til að gera æfingarnar. Þetta býður upp á meiri sveigjanleika en t.d. það að þurfa að fara út í bæ á fyrirfram ákveðnum tímum. Það að innihald æfinganna og rútínan miðast við eigin þarfir, og þann stað sem maður er á, en þessháttar þjónustu er erfitt að veita í hópiðkun. Eftirfylgdin er líka mjög öflug varðandi það að fylgjast með iðkun og þróa hana áfram. Miðað við það sem ég hef fengið er verðið líka mjög hagstætt.